سفر وکړئ او له ژوند خوند واخلئ

که هر څه د یاده ووڅي  خو د سفر تجربې هېڅکله نه هېرېږي «همداسې مو له یو او بل سره قدم واهه، هغې وویل، سفر مې نه خوښېږي.» څو کاله مخکې کله چې له ټولګي راتلم، له یوې ښځې سره مخ شوم، ستړي مشي مو سره وکړل او له یوه او بل سره معرفي شو. د هغې ښایسته وېښتانو سړی ور جذبولو. ډېر ښکلي او اوږده وېښتان یې درلودل. زما په شونډو مسکا وه، خوا ته یې ورغلم او جوړ پخیر مې سره وکړل. هغه هم ډېره خوش خلقه وه، دغه څه د دې لامل شول چې څو شېبې سره وغېږو او وخاندو. زه پر دې پوه شوم چې هغه په امریکا کې له پیدایښته بیا تر اوسه پورې بهر ته چېرته په سفر نه وه تللې. دې خبرې زه بیخي حیران کړم. ما ته لکه یوه زنداني داسې ښکاره شوه، غوښتل مې هغه ازاده کړم. له هغې مې وغوښتل چې په سهار کې د قدم وهلو پر مهال له ما سره مله شي او سره ووینو. ساعتونه یې ونیول، څو هغه قانع کړم چې پلی تګ یا د سهار له خوا قدم وهل سړی نه وژني، بلکې ګټور کار دی. بله ورځ له ما سره مله شوه، خو د قدم وهلو پر مهال یې ما ته وویل چې له مسافرۍ یا سفر کولو سره یې جوړه نه ده.

دا هم باید ووایم چې هغې هېڅکله د سفر خوند نه و څکلی، ځکه یې زړه هم نه ورته ښه کاوه. له قدم وهلو وروسته د هغې تر کوره پورې ور سره ولاړم، ډېره خوشاله وه او دا وخت پر موږ ډېر ښه تېر شو. څه موده وروسته یې ما ته مسیج وکړ او پکې لیکلي یې وو چې په سفر تللې وه، ډېر خوند یې ترې اخیستی و او یوه ډېره ښه تجربه وه ورته. دې ان د هغو ځایونو لېست راته لیکلی و چې د هغې د خوښې وړ وو

.

که رښتیا ووایم، زما پوښتنه دا ده چې که تاسو سفر ونه کړی، نو څه ډول له ژونده خوند اخلی؟ سفر په دې مانا نه دی چې تاسو هرو مرو له هېواده بېرون ووځی، هر هېواد خپله داسې سیمې، ولایتونه، ولسوالۍ او نور په زړه پورې ځایونه لري، چې په لیدلو ارزي او باید سړی یې وګوري

بېرته راځم خپلې خبرې ته. زه غواړم د دې معما په ځواب پوه شم چې تاسو ولې سفر نه کوی؟ پنځه کاله کېږي چې په یوه کور کې اوسېږی، سهار مو کار ته ځی او بېګا بېرته خپل کور ته راځی. دا کار درته ستړی کوونکی نه دی؟ تاسو په رښتیا یوه سفر ته اړتیا لری. په خپل هېواد کې یوه ښار ته سفر وکړئ او له ژونده خوند واخلئ. که تاسو ټول وخت یوازې په یوه ځای کې ژوند وکړی، سهار دندې ته لاړ شی، بېګا بېرته کور ته راشی، ژوند به مو لکه د کتاب یوه پاڼه داسې وي، خو که ښارونو او هېوادونو ته سفر وکړی، نو ژوند مو یوه لوی او له ګټورو مطالبو ډک کتاب ته ورته کېږي. نړۍ هم یوه کتاب ته ورته ده، هغوی چې هېڅ سفر نه کوي، دوی اړ دي چې د کتاب همدا یوه پاڼه ولولي.

زما یوه ملګري هند ته سفر درلود، له یو څه مودې وروسته یې لیدلوري هم بدلون وکړ. اوس یې د فکر بڼه د پخوا په پرتله بدله شوې ده. هغه هلته یو واقعي ژوند تجربه کړ، هغه پوه شو چې په هغه ځای کې ژوند له هغو فلمونو سره چې هند یې تولیدوي، توپیر کوي او د هغه ځای د خلکو واقعي ژوند هسې نه دی

زړه مو نه دی چې خپلو لمسیانو ته نوې کیسې وکړی؟ نه غواړی چې ډېرې خاطرې ولری؟ نو راځئ سفر کول درته په یوه تفریح بدل کړئ. که مو واده کړی او اولادونه لری، نو ښه ده چې له خپلې کورنۍ سره یو جادویي سفر وکړئ، څو د ټول عمر لپاره درته یوه خاطره وي. تاسو کولای شی له دې فرصت څخه په ګټې اخیستنې، له خپلې کورنۍ سره یو څه ډېر وخت تېر کړی او که مو واده نه وي کړی، بیا کولای شی له خپلو نږدې ملګرو سره په سفر لاړ شی

.

زما تر ټولې ښې او ځانګړې خاطرې په هغو سفرونو پورې تړلې دي، چې له کورنۍ او اولادونو سره مې کړي دي. یو ځل مې په یوه پنځه ورځني سفر کې له خپلې کورنۍ سره له شپږو ایالاتونو څخه لیدنه وکړه. دومره خاطرې له هغه سفر څخه لرم چې پوښتنه مه کوی. نوي ملګري مې پیدا کړل، نوي خواړه مې وخوړل او د هغه وخت ډېرې کیسې له ځان سره لرم. ژوند ډېر لنډ دی. تاسو چې هر څومره عمر خوړلي کېږي، بیا به په تېر وخت کې د سفر کولو او د ډېرو ځایونو د لیدلو ارمان کوی. ژوند ژر ژر تېرېږي. د وخت په تېرېدو سره پلی تګ، منډې وهل، سفر کول، فکر کول او د ژوند تجربه کول سختېږي. زما اوس دې ته پام شوی دی چې له وخت، ژوند او شته امکاناتو باید ګټه واخلم. کله چې تاسو سفر کوی او په چکر ځی، نو په اصل کې له ځان سره هم سفر کوی. تاسو کولای شی د سفر پر مهال له خپل ځان څخه هم ډېر شیان زده کړی

تاسو چې کله سفر کوی، په اصل کې نوي شیان کشفوی او کشف د ژوند یوه مهمه او حیاتي برخه ده. د سفر لپاره تاسو ډېرو شیانو ته اړتیا هم نه لری. د یو کوچني بکس، لپ ټاپ، تلېفون، پاسپورټ او نغدې پیسې کفایت کوي. که تاسو دغه شیان ولری، نو بیا د سفر په اړه هېڅ اندېښنه مه کوئ. زه خو له خپلو رخصتیو همداسې ګټه اخلم، ستاسو خپله خوښه. همداسې اسان او بې جنجاله سفر خوند راکوي. له دې ټولو څخه زما موخه دا ده چې یو څه مو روحي حالت ور سره ښه شي او له ژونده خوند واخلی

د هند پخواني ولسمشر عبدالکلام ویلي: «ځوانانو ته زما سپارښتنه دا ده چې متفاوت فکر وکړي، زړور اوسي، سفر وکړي او له ناشناخته ځایونو څخه لیدنه وکړي، غیر ممکن شیان کشف کړي، له ستونزو سره مخ شي او بریالي ترې راووځي. دا هغه څه دي چې ځوانان باید ور باندې کار وکړي

زما دوستانه سپارښتنه هم تاسو ته دغه ډول ده. موږ او تاسو خو ملګري یو که نه؟ هو، ډېر ښه!

کله چې وزګار وی، نو سفر وکړئ او نړۍ وپېژنئ. په دې کار سره تاسو ځان مرګ ته نه ورکوی، بلکې ډېرې تجربې به تر لاسه کړی. د بېلګې په توګه، د اوړي په رخصتیو کې کولای  شی د خپل هېواد یخو سیمو ته له کورنۍ او یا هم ملګرو سره په سفر او چکر ولاړ شی.

مشهور انګلیـسي لیکوال ډېوېډ مېچل (David Mitchell) یو وخت ویلي وو: «هغه کس چې له ډېرې شتمنۍ سره مړ شي، ګټونکی دی»، خو اصلي خبره دا نه ده، ګټونکی هغه څوک دی چې ډېرې تجربې ولري او په خوښۍ کې یې ژوند کړی وي. ولې وایي چې خپله ټوله شتمني په سفر ولګوی

نارینه او ښځينه، معمولي دوستان څنکه کېداۍ شي

 نارینه او ښځینه ګټوره معمولي دوستانه اړیکه لرلای شي؟ دې پوښتنې ته ډېر ځوابونه ویل شوي، چې په دې مطلب کې یې په اړه خبرې کوو.

زموږ د حافظې او ذهن ډېره برخه له هغو فېلمونو او سریالونو څخه ډکه ده چې سراسر خالي او افسانوي مینه وړاندې کوي. د ځوانۍ په لومړیو کې یو هلک، یوه نجلۍ ویني او په یو زړه نه، بلکې په سلو زړونو پرې ميَنېږي. هغه نجلۍ ته بې نومه عاشقانه لیکونه لیکي او په لاره کې یې د سرو ګلونو کېډۍ ږدي. مګر نجلۍ په بل زړه بایللی وي او د بل هلک ملګرې کېږي. دا ماتې خوړلی میَن د دې غمجنې ماتې تاب نه راوړي او ځانوژنه کوي او د نجلۍ په پای کې دېته پام کېږي چې تل او په هر حال کې په هماغه لومړني هلک مَینه وه. دا رومانټیک جریان د  (Dawson’s Creek and Friends)، ډېر لکه مینه (A Lot Like Love)، (Win A Date With Tad Hamilton) د نندارې سوژې دي. دلته پوښتنه دا ده، چې آیا کېدای شي د نارینه او ښځينه‌وو دوستي په یوه اپلاتوني او ژورې مینې بدله شي که نه؟

د دوو مخالفو جنسونو ملګرتیا

نارینه او ښځینه د یو بل تر څنګ ژوند کوي، له یو بل سره مراوده لري او له ماشومتوبه سره لوییږي، نو له همدې امله د دوی اړیکه نه پرې کېدونکې ده. موضوع د لومړني ټولنیز حضور څخه پیلیږي، کله چې ماشومان ښوونځي ته ځي هلته لومړۍ جنسیتي ډله جوړوي. دا ډلې معمولاً د همجنسه وګړو څخه جوړې وي، چې فرد ته نېژدې رغبت لري.  دا موضوع ادامه مومي او د عمر په لوړېدلو د پوهنتون په وروستیو کې د دوه مخالفه جنسونو ترمنځ لېوالتیا شروع کېږي. د مخالف جنس سره ملګرتیا د یو کیمیاوي غبرګون په څېر ده. فرد په دې دوستۍ کې د دې مسئلې د درک په لټه کې وي، چې مقابل لوري سره اوسېدل په هغه کې څه ډول احساسات پاروي.

کلینیکي ارواپوه، ډاکټر ایدکو تابوري (Ildiko Tabori) وايي: “کله چې موږ د ملګري (څه همجنس یا هم مخالف جنس) په هڅه کې اوسو، د هغو کسانو په لټه کې اوسو چې د شخصیتي او احساساتي پلوه موږ ته ورته وي. د دوستانه اړیکو په پراختیا کې ګډون ډېر ګټور دی…” د دې مسئلې په نظر کې نیولو سره آیا ښځینه او نارینه معمولي دوستان کېدای شي؟

ملګری/ ملګرې، مَین یا هېڅ یو

د دوستۍ له جاذبو څخه یوه هم دا ده، چې دوه تنه یو بل سره له شهوت پرته د حُسن نیت پر اساس اړیکه ولري، دا هم علم ثابته کړې چې دا ډول اړیکې شته.  (Social and Personal Relationships) مجلې یوه مقاله خپره کړې، چې په لړ کې یې ویل شوي، چې د مخالفو جنسونو وګړي سره ملګري وو، خو اړیکې یې هېڅکله د مینې رنګ نه دی اخیستی. په دې څېړنه کې هغو کسانو، چې ملګرتیا یې هېڅکله مینه‌ناکه او جنسي شوې نه وه او صرف معمولي دوستي تجربه کړې وه، ټینګې او اوږدمهاله ملګرتیا او روابط درلودل. دا موندنې ښايي چې د نارینه او ښځینه اړیکې له یوې عاشقانه او جنسي اړیکې پرته دوام کولای شي.

خو لیکوال او کارپوه آوریل مارسیني بیا د دې عقیدې مخالف دی، دی وايي: “د نارینه او ښځینه‌وو ترمنځ اړیکه الزاما د روابطو د پراختیا لپاره عاشقانه بڼه خپلوي او بالاخره جنسي تمایلات د دوو تنو ترمنځ څرګندېږي…” نوموړي وویل: “دا عقیده چې ښځې او نارینه معمولي دوستان کېدای شي؛ د خنډونو سره مله وي. په اصل کې د ښځینه او نارینه ترمنځ معمولي اړیکه هېڅکله نشي رامنځته کېدای او د دې دوستۍ تر شا تل جنسي تمایلات وي او پای کې یو له دوی تنو دا حس څرګندوي.”

جنسیتي جاذبه د اړیکو هیجان او نشاط زیاتولی شي، خو څرنګه چې مارسیني هم وايي په دې جریان کې د معمولي ملګرتیا په لاره کې خنډونه شتون لرلای شي.

د جسمي او جنسي جاذبې موانع حتی د هغو ملګرو ترمنځ چې ډېری ښې او اوږد مهالې اړیکې لري، تل شته وي. په ۲۰۱۲م کې یوې څېړنې ښکاره کړه چې زیاتره ملګرتیاوې لږ تر لږه په ټيټه سطحه جنسي تمایلات لري، په دې څېړنه کې مشخصه شوه، چې نارینه د یوې مینه‌ناکې اړیکې درلودلو لپاره نسبت ښځو ته ډېر لېواله دي.

په۲۰۰۰م کې هم یوې څېړنې، چې په آمریکا کې ترسره شوې او ۳۰۰ محصلین پوښتل شوي وو، څرګنده کړه، چې ۶۷٪ د ملګرتیا جریان کې یې جنسي اړیکې درلودې، په داسې حال کې چې ۵۷ سلنو یې هېڅکله د ملګرتیا په پیل کې دا فکر نه درلود.

نو منطقي ده چې دا پایله تر لاسه کړو، چې د ښځینه او نارینه‌وو خلقت ته په پام سره ښځې او نارینه که هر څو هم د یوې سالمې او ژورې دوستۍ په ساتلو ټینګار کوي، امکان شته دا ډول لېوالتیاوې رامنځته شي، چې ځینې یې په کنټرول برلاسي او ځینې یې بیا په وړاندې تاب نه راوړي او زغم له لاسه ورکوي.

دخوشاله جوړو لس عادتونه

تاسو هم په خپلې شاوخوا کې نېکمرغه جوړې لرئ، چې تازه یې واده کړی وي او داسې ښکاري، چې له یو بل سره د اوسېدلو له هرې شېبې څخه خوند اخلي؟ څنګه امکان لري، چې له یو بل سره د ډېرې مودې ژوندکولو وروسته او هغه فشار او سټرس، چې ورځنی ژوند او کورني مسایل یې په انسان باندې واردوي، هغوی وکولای شي خپله اړیکه د لومړیو ورځو په څېر ښه وساتي؟ د دې لیکنې په دوام د نېکمرغه جوړو په لسو عادتونو باندې رڼا اچول کېږي.

په هم مهالې توګه او په ګډه خوب ځای ته ځي

په یاد مو دي چې د واده په لومړیو کې هېڅکله وروسته له دې چې د ژوند شریک مو خوب ځای ته تله، تاسو د ټلویزیون نندارې ته نه کېناستئ؟ دا چاره د ګډ ژوند د دوام لپاره ډېر زیات ارزښت لري. کله چې په ګډه خوب ځای ته ځئ، حتا که جنسي اړیکه هم ونه لرئ، نو په دې باندې ډاډمن کېږئ، چې د یو بل ترڅنګ یاست. له یو بل سره ویده کېدل د دې ښکارندویي کوي، چې له یو بل څخه خوښ او راضي یاست.

لېوالتیاوې پیدا کوي

ډېره زیاته مهمه ده، چې په ګډه د یوه کار له ترسره کولو څخه خوند واخلئ. په ډاډ سره ویلی شم، چې تاسو د یو بل له ټولو بوختیاوو څخه خوند نه اخلئ، دا چې د خپل ځان او خپلو بوختیاوو لپاره وخت په پام کې ونیسئ، د اړیکې لپاره کولای شي ډېر ګټور تمام شي، خو باید داسې فعالیتونه پیدا کړئ، چې تاسو دواړه د یوې جوړې په توګه له ترسره کولو څخه یې خوند واخلئ، د رسټورانټونو له ازمویلو څخه نیولې د سریالونو تر ننداره کولو پورې، چې ستاسو دواړو خوښېږي، هرڅه چې ستاسو دواړو لپاره په زړه پورې وي، نو ترسره یې کړئ.

یو بل لمس کوي

کوچني کارونه لکه دا چې د یو بل لاس ونیسئ، یو بل په غېږ کې ونیسئ او د یو بل په اوږو باندې لاس واچوئ، ستاسو ترمنځ د نږدې والي احساس زیاتوي او د بریالي ګډ ژوند یو له مهمو لاملونو څخه ګڼل کېږي. کله چې کلونه د یو بل ترڅنګ واوسئ، په ډېرې آسانۍ سره کېدلای شي، ستاسو ترمنځ صمیمیت او نږدې والی له منځه لاړ شي. کله چې لاس په لاس په سړک باندې قدم وهئ، یو بل او دغه راز نورو ته دا پیغام ورکوئ، چې تاسو نېکمرغه یاست.

په یو بل باندې بېځایه نه غوسه کېږي

نېکمرغه جوړې، کوم مثبت کارونه، چې د ژوند شریک یې ترسره کوي، پرې ټینګار کوي او ستایي یې. هغوی د تل د یو بل له تېروتنو څخه یادونه نه کوي، غوسه کېږي نه او په یو بل باندې نیوکه نه کوي. که کوم څه تاسو ډېر ځوروي، نو په اړه یې د خپل ژوند له شریک سره خبرې وکړئ، خو دا چې وغواړئ تل د هر کوچني څیز لپاره غوسه شئ، اصلاً ښه کار نه دی او ستاسو خواشیني کول، د مقابل لوري لپاره مو خپل ارزښت له لاسه ورکوي.

د خدای پامانۍ پرمهال د یو بل ښکلول او د درسره  مینه لرل ویل نه هېروي

د ځینو کوچنیو او تکراري کارونو ترسره کول، ښایي د ځینو کسانو لپاره بې خوند او بېځایه وي، خو ډېر زیات ضروري دي. سهار مخکې تر دې، چې دندې او کار ته لاړ شئ، یو بل ښکل کړئ او یو بل ته ووایئ، چې درسره مینه لرم او له غرمې وروسته هم له یوې اوږدې کاري ورځې وروسته همدا کار ترسره کړئ؛ دا کار په ډېرې مینې او لېوالتیا سره ترسره کړئ او وبه وینئ، چې د دې کار په ترسره کولو او د احساساتو په شریکولو، له یوبل سره ډېره مینه او لېوالتیا پیدا کوئ. کله چې خپله ورځ په مثبت کار سره پیل کړئ، نو ښه ورځ به په مخکې ولرئ.

یو بل نه هېروي

آیا داسې کېدای شي، چې هغه کس هېر کړئ، کوم چې هره ورځ ورسره ژوند کوئ؟! هو دا پېښه په ډېرې آسانۍ سره رامنځته کېږي، زموږ په لېونۍ نړۍ کې، په ډېرې آسانۍ ورځنۍ بوختیاوې د دې سبب ګرځي، چې یو بل سره هېر کړو. په یاد مو دي، چې د واده په لومړیو ورځو کې د یو بل له لیدلو سره مو څومره مینه او لېوالتیا لرله؟ اوس څه څیز د دې احساس مخه نیولې ده؟ د یو بل لپاره وخت په پام کې ونیسئ او د خپل مقابل لوري د خوشاله کولو لپاره که هرڅومره کوچنی کار هم وي، نو ترسره یې کړئ. د الله (ج) ډېر شکرونه پرځای کړئ، چې له یو چا سره مینه لرئ او هغه هم له تاسو سره مینه لري.

له یوبل سره بهر وځي

له یو بل سره ژمنه کول ډېره اړینه ده، لکه د کوژدې د دوران په څېر له کوره بهر له یو بل سره د لیدلو ژمنه وکړئ او د ټولې شپې لپاره پروګرام جوړ کړئ، دا کار د دې سبب ګرځي، چې د اړیکې د ښې کېدو او د یو بل له ملتیا څخه د خوند اخیستلو لپاره هڅه وکړئ، که له نظره مو دا کار خندونکی راشي، دا چې په ځان باندې پام کوئ او له کوره بهر د خپل ژوند له شریک سره د لیدلو ژمنه وکړئ، ستاسو اړیکه پیاوړې کوي او په تاسو کې د نېکمرغۍ احساس را ژوندی کوي. کله چې د خپلې مینې د اور د ژوندي ساتلو لپاره هڅه وکړئ، نو د نېکمرغۍ په لاره کې ګام پورته کوئ.

هغوی د یو بل له ملتیا څخه خوند اخلي

دا چې له یوبل سره د رښتینو، واقعي او صمیمي دوستانو په څېر واوسئ، ډېرې زیاتې هڅه ته اړتیا لري، کله چې دومره زیات یو د بل ترڅنګ اوسېدلي یاست، چې داسې احساس کوئ ټول عمر مو یو د بل ترڅنګ تېر کړی دی، په ډېرې آسانۍ د یو بل حضور نالیدلی نیسئ. د خپلو لېوالتیاوو، د هغو پېښو په اړه، چې د ورځې په اوږدو کې ورسره مخامخ کېږئ او هغه کسان، چې پېژنئ یا بل هر څیز چې له خپل ښه دوست سره ورباندې بحث کوئ، له یو بل سره پرې خبرې وکړئ.

له تکرار څخه تښتي

ستاسو اړیکه نباید د یوه تنظیم شوي پروګرام په څېر وي. آیا هره ورځ په یوه ټاکلي ساعت له یو بل سره اړیکه نیسئ؟ هره شپه هماغه تکراري کارونه ترسره کوئ؟ که داسې وي، نو په خپل پروګرام کې بدلون رامنځته کړئ. د یوې جوړې په توګه ستاسو ژوند نباید د وړاند وینې وړ وي. انسان هېڅکله، له هېڅ څیز څخه، چې د یوه بدلون نه منونکي پروګرام په څېر وي، خوند نه شي اخیستی، یو بل په حیرانونکو او په زړه پورې کارونو سره خوشاله کړئ.

هغوی خپل ګرځنده ټیلیفون له ځانه لرې کوي

نېکمرغه جوړې، کله چې د یو بل ترڅنګ وي، نو خپل ګرځنده ټیلیفونونه له ځانه لرې کوي او خپل ټول پام په یو بل باندې متمرکز کوي. هغه پیغامونه، چې په وایبر او واټساپ یې ترلاسه کوي اړین نه دي او د اینسټاګرام انځورونه به هم ونه تښتي. کله چې حواس مو د خپل موبایل خواته وي، یوازې بدن مو د یو بل ترڅنګ دی او له یو بل سره د اوسېدو احساس نه کوئ، د دې لپاره، چې له هغه وخت څخه خوند واخلئ، کوم چې له یو بل سره یاست، نو خپل ګرځنده ټیلیفونونه له ځانه لرې کړئ.

ګلپي خوړل شل روغتيايي ګټې لري

ګلپي د ښو غذايي موادو ترڅنګ ښه روغتيايي تاثيرات هم لري، په ګلپي کې موجود ويټامينونه او منرالونه د انسان د روغتيا لپاره په ځانګړي ډول د زړه او پوستکي لپاره د يادولو وړ دي.

یاده سبزي هم په ګران هېواد افغانستان کې پرېمانه پېدا کېږي، هم يې بيه مناسبه وي، پخول یې ډېر وخت او زحمت نه غواړي، په ډېر کم وخت کې پخېږي او په زړه پورې خوند لري.

د ويټامين سي او پوټاشیم څخه غني ګلپي د نورو روغتيايي ګټو سره سره د کولېسټرولو په کنټرول کې هم درنه ونډه لري، د دې ترڅنګ د ويښتانو د روغتيا لپاره هم د ګلپي ګټه يادولو وړ ده.

په سل ګرامه ګلپي کې ۲۵ کالوري انرژي، ۵ ګرامه کاربون هيدارت، ۲ ګرامه فايبر، ۲ ګرامه پروتين، ۴۲.۲ ملي ګرامه ويټامين سي، ۲۹۹ ملي ګرامه پوټاشیم، ۲۲ ملي ګرامه کيلسيم او ۰.۵ ملي ګرامه اوسپنه شتون لري.

د ګلپي خوړل شل روغتيايي ګټې په لاندې ډول دي

د زړه روغتيا په لوړه کچه ساتي

د کولېسټرولو سويه نورمال ساتي

د بدن دفاعي سيسټم قوي کوي

د امېدواره مېرمنو د ماشوم وده چټکوي

د کيلسيم ذخیره ګلپي هډوکي قوي کوي

د سترګو روغتيا ته ګټه لري.

پکې د موجود زينکو په واسطه د زخمونو د زر جوړېدو سبب کېږي

د نويو حجرو په جوړولو کې مرسته کوي

د وزن په کمولو کې مرسته کوي

په ګلپي کې موجود سوډيم په بدن کې د معاياتو نظم برابروي

د سږو، سينې او مثانې د سرطان مخنيوی کوي

د ويښتانو په روغتيا کې مرسته کوي

د پوستکي په روغتيا کې ګټور تمامېږي

په بدن کې د ذخیره شویو زهري موادو په خروج کې مرسته کوي

عصبي سيسټم قوي کوي

د ‌معدې د زخمونو په جوړېدو کې مرسته کوي

حافظه قوي کوي

د قبضیت مخه نيسي

د مفاصلو درد کموي

د ډېر وخت لپاره مو ماړه ساتي

پاملرنه

په زياته اندازه د ګلپي خوړل مو په معده او کولمو کې ګاز زیاتوي، که له حده زياته يې مسلسل وخورئ، د پښتورګو ډبرې هم جوړولی شي، لنډه دا چې هر څه په مناسبه اندازه خوړل او کول پکار دي.

لس څیزونه هره ورځ سهار خپل ځان ته ووایه

په ورځ کې سهار وخت مهم ګڼړل کيږي  که له کیڼ اړخ څخه را ویښ شئ، نو کولای شئ ډاډه شئ، چې یوه بده ورځ ستاسو په تمه ده، خو برعکس؛ که سم پیل ولرئ، نو کولای شئ په دوام یې ښه ورځ ولرئ. له ښه خوړنیز رژیم او ښو سندرو څخه پرته، نور څیزونه هم شته، چې کولای شي له تاسو سره د ښې ورځې په لرلو کې مرسته وکړي. اوس یې وخت را رسېدلی دی، چې هره ورځ سهار دا لس څیزونه خپل ځان ته ووایئ، ترڅو ښه پیل ولرئ.

نن د محشر ورځ ده

هرڅوک له نوي څیز سره مینه لري، دا ژمنه یو نوی پیل دی، چې موږ ته خوشبیني راکوي او دغه راز موږ ته د دې یادونه کوي، چې مهمه نه ده، مخکې اوضاع څومره بده وه، ځکه چې تېر، تېر شوی دی او اوس یې وخت را رسېدلی دی، چې مخ پر وړاندې حرکت وکړئ او هغه نوي فرصتونه، چې ستاسو په لور را روان دي، وې منئ.

کولای شم، هر هغه څه چې غواړم واوسم

دا یانې روحیه، موږ ټول خپل خوبونه لرو، خو ټولو ته یې نه رسېږو، ولې؟ ځکه په کافي اندازه هڅه نه کوو، خوبونو ته رسېدل ناشونی کار نه دی، ټول هغه کارونه، چې باید تاسو یې ترسره کړئ، دا دي، چې یوازې خپلې شاوخوا ته وګورئ، ترڅو فرصتونه په ښه توګه ووینئ.

مهمه ده، چې په یاد ولرئ، هغه کسان، چې خپل خوبونه یې څارلي دي او هغو ته رسېدلي دي؛ هغه کسان دي، چې هره ورځ یې خپل ځان ته ویل، (زه کولای شم)، هغوی سهار په غوسې او خپګان سره نه دي را ویښ شوي، بلکې هڅه یې کړې ده، چې په مثبت لید سره خپل سهار پیل کړي او خپله ټول هڅه یې کړې ده، چې حتا یو ګام هم خپلو خوبونو ته د نږدې کېدلو لپاره، په چټکۍ سره یې پورته کړي.

بې ارزښته څیزونه، زما ورځ نه خرابوي

ولې درته مهمه ده، چې کوم کس تاسو په اینسټاګرام کې انفالو کړي یا کله چې تاسو یې ولیدلئ، نو خپله لاره یې چپه کړه؟ د هغو څیزونو په پرتله، چې واقعاً کولای شي د یوه کس ورځ خرابه کړي، دا هېڅ په حساب کې نه راځي، په همدې دلیل هڅه وکړئ، چې خپل پام هغو څیزونو ته ور واړوئ، چې واقعاً مهم دي.

زه نن ورځ کې ژوند کوم

منو یې، چې پرون بده ورځ وه! اوضاع ښه پرمخ لاړه نه او هرڅه خراب شول، خو حدس ووهئ، چې ښه خبر څه دی؟ ښه خبر دا دی، چې پرون تېره شوې او پای ته رسېدلې ده، هر هغه څه، چې له پرون څخه پاتې دي، خاطره او درس دی، چې کولای شئ ترې وایې خلئ، نو خپله ټوله هڅه د نن لپاره وکړئ، یوازې د نن لپاره.

ماتې خوړل ستونزه نه لري

کله وخت را ویښېږو او په یاد مو راځي، چې پرون مو د یوه کار د ترسره کولو فرصت درلوده، خو په هغه کې مو ماتې وخوړه، دا ډول افکار کولای شي، چې له تاسو څخه د سهار لومړۍ برخه واخلي او پاتې ورځ مو در خرابه کړي.

هغه څه، چې باید خپل ځان ته یې ووایئ، دا دي، چې په حقیقت کې ماتې خوړل، کومه ستونزه نه لري، خپل ځان ته د دې یادونه وکړئ، چې ټول ماتې خوري، حتا بریالي کسان. موضوع داده، که وکولای شئ، چې له ستونزو څخه درس واخلئ، نو کولای شئ، چې له هغو څخه ګټه ترلاسه کړئ. ماتې یوازې د ودې او ځواکمن راتګ لپاره یو فرصت دی.

زه په خپلو کړنو ویاړم

ستاسو ټاکنې هغه څیزونه دي، چې تاسو تعریفوي، که چېرې د زړه له کومې ځان ته د دې یادونه وکړئ، چې ټاکنې مو په خپلو شرایطو کې سمې وې، نو ښه احساس به ولرئ. هېڅوک نه شي کولای، چې د سمو کارونو د ترسره کولو لپاره، په تاسو باندې نیوکه وکړي، نو په خپلو اصولو پسې ونښلئ او د نورو بېځایه او بې بنسټه خبرې نالیدلې ونیسئ.

زه ښکلی یم

ښکلا په خپل ځان باندې د باور لرلو لپاره ډېره زیاته مهمه ده او حتا یو له هغو لومړنیو څیزونو څخه، چې سهار یې خپل ځان ته وایئ، دا وي، چې تاسو ښکلي یاست! په دې ترتیب تاسو په خپل ځان کې مثبت لید رامنځته کوئ او دا لید به د عمر تر پایه له تاسو سره وي.

زه یې توان لرم

هو تاسو یې ترسره کولای شئ! څو ځله داسې شوي دي، چې غواړئ د شپې ویده شئ او په دې اړه فکر وکړئ، هغه کار چې له تاسو څخه غوښتل شوی دی، نه شئ کولای ترسره یې کړئ؟ څو ځله داسې شوي دي، چې سهار د ماتې په احساس له خوبه را ویښ شوي یاست؟ دا احمقانه ده، که تصمیم ونیسئ او هڅه وکړئ، هر کار ترسره کولای شئ.

سهار خپل ځان ته په هینداره کې ووایئ، چې تاسو په بشپړه توګه کولای شئ، دا کار ترسره کړئ او هېڅوک نه شي کولای، چې له تاسو څخه یې په غوره توګه ترسره کړي.

زه ډېر خوش قسمته یم، چې ژوندی یم

څو ځله داسې شوي دي، چې سهار له خوبه را ویښ شئ او د ژوندي پاتې کېدلو په خاطر مو د الله (ج) شکرونه پرځای کړي وي؟ موږ ټول فکر کوو، چې هره ورځ ژوندي یاستو او د همدې لپاره دا معجزه نالیدلې نیسو، خو حقیقت دا دی، چې موږ بل سهار را ویښ شوي یو او موږ ته د ژوند کولو فرصت راکړل شوی دی، چې دا یانې کولای شو، خپلو غوښتنو ته د رسېدو په لاره کې لا ډېره هڅه وکړو.

نن زما ورځ ده

په بشپړه توګه همداسې ده! که تاسو ورځ خپله نه کړئ، که تاسو هڅه ونه کړئ، چې په ټول توان سره ورپورې ونښلئ او خوشې یې نه کړئ، نو دا ورځ ده، چې ستاسو کنټرول به په خپل لاس کې واخلي او دا اصلاً ښه نه ده، ځکه چې هغه وخت په کوچنۍ پېښې سره کولای شي، تاسو وځوروي او له خپل تګلوري څخه مو لرې کړي.

دروس سره مرسته کونکی افغان نوم افشا شو

هره ورځ ۱۰ تر ۳۰ دقیقو پلی تګ وکړئ او د تګ پر وخت وخاندئ. تر ټولو نه دا ښه لاره د خپګان د لمنځه وړلو لپاره ده.

 هره ورځ حداقل د ۱۰ دقیقو لپاره په یو ارامه ځای کې چې هېڅ غږونه نه وي کېنو.

هېڅکله لږ خوب مه کوئ خپل په ټاکلي کچه هره شپه باید خوب وکړئ.

کله چې هر سهار له خوبه پاڅېږئ، تر ټولو لومړۍ دا باید له ځان سره ووایاست، چې د نن ورځې موخه مې….. دا ده.

تل له دې دریو شیانو سره ژوند وکړئ، ځواک، احساس او شوق.

د ۷۰ کالو څخه ډېر او د ۶ کالو څخه کم عمر سره په ورځ کې خپل وخت تېر کړئ.

ډوډۍ په خپل وخت وخورئ، د مېوو او له سبزیجاتو څخه ډېره ګټه اخلئ، چې وکولای شئ خپل ځان په سمه توګه تغذیه کړئ.

هڅه وکړئ حداقل په ورځ کې د دریو نفرو په خوله خندا راولئ.

خپل ځواک په بېځایه او منفي فکرونو یا هم هغه څه چې ستاسو په واک کې نه دي مه مصرفوئ، د هغه پر ځای په مثبتو اړخونو فکر وکړئ او ترسره یې کړئ.

سهار سم خوراک وکړئ، غرمه منځنۍ او ماښام لږ ډوډۍ وخوړئ.

حتمي نه دي چې په هر بحث یا هر ځای کې ګټونکي شئ، نو د نظرونو اختلافات په ځان ومنه.

خپل ژوند له نورو سره مه مقایسه کوئ، تېر هېر او راتلونکي په اړه فکر وکړئ. هېڅوک ستاسو د غم او خوشحالي مسولیت نه لري، پرته له تاسو خپله.

تل بښنه وکړئ، هر وضعیت څه بد وي څه ښه حتماً یو وخت بدلون مومي.

تل د ښه ملګرو سره په اړیکه کې اوسئ، ځکه د یوازیتوب په وخت کې به یوازې هغوی درسره وي.

هره شپه کله چې ویدېږئ، نو لومړۍ د خپل ورځ لپاره مننه وکړئ.

نوکانوکې سپین داغونه یوازې د وېټامینونو د کموالي نښه نه ده

د خوړو او د تغذيې د برخې متخصصې نرګس جوزداني د نوکانو د سپینو داغونو په اړه وايي:

“د نوکانو لاندې د لوکوشینا ناروغي یا د سپینو خطونو رامنځته کېدل، بېلابېل لاملونه لري، چې تر ټولو معمولي یې د نوکانو د سطحې ضربه لیدل دي.”

جوزدانۍ د دغو خطونو د جوړېدلو عواملو ته په اشارې سره وويل:

“آلرژي، حساسیت، د زړه ناروغي، د سږو ستونزې، کیمیاوي درملنه، شکر، د ځیګر سیتوزېت، د تایراید غُدې کم کاري، جلدي ناروغۍ (اګزما) او د معدني موادو د کمښت له امله سپین خطونه جوړېږي.”

جوزدانۍ د معدني موادو د کمښت د اغېز په اړه وايي:

“د وېټامینونو کموالی لکه کلسیم، زېنک او اوسپنه کولای شي وګړو ته د نوکانو د سپینو لکو ستونزه پیدا کړي.”

نوموړې د دې لکو د کمېدلو او لمنځه تلو د حللارې لپاره وویل:

“د نوکانو د سطحې مرطوب ساتل، په تکراري او لنډمهاله توګه د نوکانو رنګ نه کارول، د دې ستونزې د کمېدو لامل کېږي.”

هغې د نوکانو د سطحې د تقويې لپاره مناسبو خوړو ته په اشارې وویل:

“غوره ده پوه شئ چې پروتین او زېنک د غوښې او حبوباتو څخه په بدن کې تر لاسه کېږي او په ورځني ډول مصرف یې د نوکانو د غښتلتیا سره مرسته کوي.”

نوموړې په پای کې زیاته کړه:

“په بدن کې د کلسیم د تامین سرچینه شیدې دي او هر ګیلاس شيدې ۲۴۰ ملي ګرامه کلسیم لري، نو د شیدو په روزانه څښلو سره د بدن د کلسیم تعادل ساتلی شئ.”

اوه خبرې دځان خوښ ساتلولپاره

د خوشحاله ژوند ټېرولولپاره ځینې لارې چارې دي چې دلته یېلوستلئ شئ

 د امریکا د یېل پوهنتون د دماغي زده کړو او روانپوهنې پروفیسوره لوری سانتوس وایي: خوشحالي داسې څه نه ده چې پخپله کېږي، بلکې که موږ یې تمرین وکړو، نو دایې ښه لاره ده.

دا وایي: ساینس ثابته کړې چې د ځان خوشحالول یو ډول خوارۍ ته اړتیا لري دا اسانه کار نه دی، وخت غواړي نو غوړه لاره یې تمرین دی.

ښه خوب انسان خوشحالوي: که تاسو هڅه وکړئ د یوې اونۍ لپاره هره شپه ۸ ساعته خوب وکړئ دا به مو خوشحاله وساتي، ځکه دا نه یوازې ستاسې ستړیا له منځه وړي، بلکې بېرته مو تازه او ځواکمن ساتي.

ژور سوچ: لس دقیقې یوازې او په سوچ کې تېرول ډېره ګټه لري نه دا چې ټوله ورځ په سوچ او خپګان تېره شي، د فکر او سوچ لپاره باید یو ځانګړئ وخت وټاکو، نو کله چې دا لس دقیقې سوچ کوئ، سترګې پټې کړئ او ژوره ساه واخلئ، نو ډېر به مو ارام کړي.

 تل مثبت فکر وکړئ: مثبت فکر مو له غم او خپګان څخه ژغوري او همدا فکر تاسو ته مثبته انرژي درکوي، چې تل خوشحاله اوسئ.

له کورنۍ او ملګرو سره وخت تېر کړئ: تل د هغه خلکو سره وخت ډېر تېر کړئ کوم چې ډېر درباندې ګران وي. څېړنې ښیي هغه خلک چې له کورنۍ او ملګرو سره ډېر وخت تېروي تر یوازې خلکو خوښ وي او د خوښۍ هورمون هم ډېروي.

 هڅه وکړئ چې په اوس کې ژوند وکړئ: نه دا چې د پخوا په هکله په سوچونو کې ډوب واوسئ او یا هم د راتلونکې په هکله فکر وکړئ نو فقد یوازې د اوس په هکله سوچ وکړئ.

 مجازي نړۍ څخه ځان لري کړئ: په مجازي نړۍ کې اوسېدل کېدای شي موږ ته د خوښۍ ناسم احساس راکړي، نو که غواړئ چې په ژوند کې په ریښتني ډول خوشاله واوسئ نو له ټولنیزو رسنیو ځان لرې وساتئ او خلکو سره مخامخ وخت تېر کړئ.

د نورو په هکله فکر کول پرېږدئ، د دې پر ځای چې نورو په هکله فکر کوئ ځان په اړه فکر وکړئ. ځکه د نورو په هکله فکر کول ستاسي ذهن ګډوډوي.

د ارامه اوسالم ژوند په اړه ۱۴سلا مشورې

      دارامهماغزولرلولپاره ۸ ساعته خوب کوه.

       د سترګو لید دې زیاتوالي لپار، ن د شپې لخوا وړاندې له دې چې ویده شې خپل د پښو تلی په غوړیو  . غوړ او مساج کوه.

.       د ښه هاضمه لپاره د سړو شویو خوړو له خوړلو ډډه وکړه.

      که غواړې کولمې دې روغې پاتې شي، نو د سرو شویو خوړو پر ځای ترکاري زیات خوره.

       که غواړې ځیګر دې خراب نه شي، نو د غوړیو او زیات شحمیات لرونکو خوړو ډډه وکړه.

      که غواړې پښتورګي دې خراب نه شي، نو د شپې لخوا اوبه لږې څښه.

      که غواړې د ادرارو سیسټم دې روغ وي، نو په معمول ډول خام پیاز خوره.

   که غواړې پښتورګي دې روغ وي، نو مخکې له دې چې ویده شي مثانه دې خالي کړه.

       که غواړې اپنډیکس نه شې، نو په معمول ډول د لیمو له جوس څخه ګټه پورته کوه.

    د ستونی د نه خرابېدو لپاره په معمول ډول له مرچو ګټه پورته کوه.

     که غواړې زړه دې ژوندی پاتې شي، نو مالګه لږ کاروه.

    که غواړې سږي دې روغ پاتې شي، نو له سګرټ څکولو ډډه وکړه.

     که غواړې د پوزې ستونزې درته پیدا نه شي، نو په معمول ډول نعنا خوره.

.     په پای کې، که د نورو خلکو روغتیا غواړې، نو دغه پیغام ورسره شریک کړه.